Il-lokalità ta’ San Ġiljan, li bħal Tas-Sliema, tinsab mal-kosta, hija magħrufa l-aktar għall-qasam turistiku. Fil-fatt f’din il-lokalità, hemm għadd kbir ta’ lukandi u negozji mmirati l-aktar biex jolqtu t-turisti li jigu jżuru lil pajjiżna. Lokalità li tifforma parti minn San Ġiljan u li bla dubju ta’ xejn, tigbed eluf ta’ żgħażagħ lejha kull tmiem il-ġimgħa hija Paceville.

Sa qabel l-1800, San Ġiljan kien jikkonsisti biss fil-Palazz ta’ Spinola, il-knisja l-qadima u ftit bini tal-bdiewa fil-kampanja tal-madwar.

Knejjes

L-aktar evidenza antika għall-knisja ta’ San Ġiljan kienet iz-żjara ta’ l-Isqof Tommaso Gargallo fl-1601. Jingħad li l-Knisja nbniet fl-1580 u kienet iddedikata lil San Ġiljan. Fl-1736, meta Monsinjur Alpheran de Bussan rega’ żar San Ġiljan, innota li l-lokalità kienet diġà magħrufa bhala “Portus Sancti Juliani” li tfisser “wara l-qaddis patrun”, evidenza illi l-isem medjevali ta’ qabel “Qaliet Gnien il-Fieres” kien twarrab fil-ġenb.

Fl-1854, is-600 resident li dak iż-żmien kienu jgħixu f’din il-lokalità, ressqu applikazzjoni quddiem l-awtoritajiet tal-Knisja bil-għan li San Ġiljan isir parroċċa; ħaġa li ġabet oġġezzjoni kbira minn Birkirkara, tant li t-talba tal-Ġiljanizi ġiet imwarrba. B’danakollu, 37 sena wara, jiġifieri fl-1891, reġgħet saret applikazzjoni oħra, fejn din id-darba ġiet aċċettata.

Festa reliġjuża

F’San Ġiljan tiġi ċċelebrata l-festa tal-Patrun Qaddis tagħhom li jġib l-istess isem ta’ din il-lokalità – San Ġiljan. Il-festa tiġi ċċelebrata kull sena fl-aħħar Ħadd ta’ Awissu. Din is-sena fil-fatt se tiġi ċċelebrata fil-31 ta’ Awissu 2008.

Popolazzjoni

Il-popolazzjoni ta’ San Ġiljan illum hija ta’ 7,867; filwaqt li votanti reġistrati sa Ottubru 2007, huma 5,880.

Tagħrif importanti