Stqarrija għall-Istampa maħruġa minn Dr Michael Falzon, Kelliem Ewlieni għall-Intern u s-Sigurtà

Gvern Nazzjonalista dgħajjef dwar l-immigrazzjoni Illegali

B’dak li seħħ fl-istituzzjonijiet Ewropej f’dawn l-aħħar jiem, kien prova oħra ta’ kemm il-Gvern Nazzjonalista huwa dgħajjef quddiem il-problema ta’ l-immigrazzjoni illegali u kemm ma hux kapaċi jħares l-interess nazzjonali ta’ pajjiżna.

Il-fatt illi l-Gvern Malti ma kienx kapaċi jivvota kontra r-regoli ġodda fir-rigward tal-Frontex, liema regoli jgħabbu l-piż kollu fuq il-pajjiż li jkun salva lill-immigranti llegali, juri għal darba oħra biċ-ċar kemm il-Gvern Nazzjonalista mhux kapaċi jieħu pożizzjonijiet determinati fl-aħjar interess tal-Maltin u l-Għawdxin.

Id-diskors kollu tal-Prim Ministru illi Malta tista’ ma tieħux sehem fl-operazzjonijiet tal-Frontex jekk ma jinbidlux dawn ir-regoli huwa biss kliem vojt. Il-Gvern Malti kellu l-opportunità li jivvota kontra dawn ir-regoli fil-Kunsill ta’ l-Ewropa, iżda dan m’għamlux għalkemm fi kliem l-istess Prim Ministru dawn ir-regoli jiżvantaġġjaw bil-kbir lil pajjiżna.

Għal kuntrarju l-Membri Parlamentari Ewropej Laburisti ħadu pożizzjoni fl-aħjar interess ta’ pajjiżna u vvutaw kontra dawn ir-regoli.

Dik hi d-differenza essenzjali bejn il-Gvern Nazzjonalista li jparla ħafna u jagħmel ftit li xejn u l-Partit Laburista illi f’kull okkażjoni jpoġġi l-interess ta’ Malta, l-ewwel u qabel kollox.

Dr Michael Falzon LL.D., A.C.I.B., M.P.
Kelliem Ewlieni Laburista għall-Intern u s-Sigurtà

Dr Michael Falzon u l-familja tiegħu jixtiequ jawguraw l-Għid it-Tajjeb lill-Maltin u l-Għawdxin kollha, speċjalment lill-kostitwenti tat-Tieni u l-Għaxar Distretti Elettorali

Stqarrija għall-Istampa maħruġa minn Dr Michael Falzon, Kelliem Ewlieni għall-Intern u s-Sigurtà

Ringrazzjament għall-ħidma tad-Dipartiment tal-Protezzjoni Ċivili b’risq il-vittmi tat-terromot f’Haiti

Il-Kelliem Ewlieni Laburista għall-Intern u s-Sigurtà Dr Michael Falzon feraħ u rringrazzja lill-membri tad-Dipartiment tal-Protezzjoni Ċivili li f’dawn l-aħħar jiem ħadmu bis-sħiħ biex ikunu ta’ għajnuna biex jintbagħtu containers bl-affarijiet essenzjali lejn Haiti, li ftit tal-jiem ilu ntlaqat minn terremot li qed jingħad ħalla mal-mitejn elf ruħ mejta.

Dr Falzon qal li ta’ min ifaħħar ukoll il-ġest tal-poplu Malti u Għawdxi li wieġeb bi ħġaru għas-sejħa għall-għajnuna għal persuni milquta minn dan it-terromot.

Filwaqt li mill-ġdid irringrazzja lid-Dipartiment tal-Protezzjoni Ċivili għall-ħidma kontinwa tiegħu, Dr Falzon ħeġġeġ għal aktar ħidma u għajnuna favur kull min jispiċċa vittma ta’ diżastru naturali, bħal dak li seħħ f’Haiti.

Dr Michael Falzon LL.D., A.C.I.B., M.P.
Kelliem Ewlieni Laburista għall-Intern u s-Sigurtà

Stqarrija għall-Istampa maħruġa minn Dr Michael Falzon, Kelliem Ewlieni għall-Intern u s-Sigurtà

Suċċess ieħor mill-Pulizija fil-ġlieda kontra t-traffikar tad-droga

Il-Kelliem Ewlieni Laburista għall-Intern u s-Sigurtà, Dr Michael Falzon f’isem il-Partit Laburista jifraħ lill-Korp tal-Pulizija għas-suċċess li għamlu l-bieraħ meta rnexxielhom isibu numru konsiderevoli ta’ droga ecstasy u fl-istess ħin jarrestaw persuni li allegatament kienu nvoluti f’dan it-traffikar.

Bla dubju ta’ xejn dan is-suċċess huwa ta’ sodisfazzjon, aktar u aktar meta sar f’qasam tant miġġieled mill-Korp, dak tat-traffikar tad-droga.

Filwaqt li ringrazzjament imur għall-membri kollha tal-Korp tal-Pulizija għall-ħidma li jwettqu ta’ kuljum, Dr Falzon jinsisti illi l-Pulizija għandu jkollhom l-aħjar kundizzjonijiet u mezzi, biex permezz ta’ hekk ikun jistgħu jaqdu dmirhom aħjar, fl-aħjar interess taċ-ċittadini Maltin u Għawdxin.

Dr Michael Falzon LL.D., A.C.I.B., M.P.
Kelliem Ewlieni Laburista għall-Intern u s-Sigurtà

Il-programm Xarabank tal-bierah jaghti ragun lill-Ghaqda Piroteknika Maltija.

Kull min il-bierah ra l-programm Xarabank, seta’ jiggudika ghalih innifsu jekk dan fil-fatt, kienx wiehed bilancjat versu l-arti Piroteknika Maltija.

Jintqal bla tlaqlieq ta’ xejn li s-Sur James Catania kien qed jigdeb sfaccatament meta nsinwa li huwa xi darba kien tkellem ma’ xi membri tal-kumitat ta’ l-Ghaqda Piroteknika Maltija u dawn b’xi mod urew illi ma riedux jitkellmu mieghu. Ghal kuntrarju, sal-bierah stess fl-istess gurnata li xxandar il-programm innifsu, ghaddiet korripondenza bejn is-Sur James Catania u l-Konsulent Legali ta’ l-Ghaqda Piroteknika Maltija fejn l-istess Sur Catania gie nfurmat illi l-proposti tieghu se jitressqu fl-ewwel laqgha li jmiss tal-kumitat ta’ l-Ghaqda Piroteknika Maltija.

Din il-korrispondenza hija ghad-dispozizzjoni ta’ kull min jixtieqha. Dak li qal is-Sur Catania hu gideb sfaccat.

L-istess mhux minnu illi l-hoss tal-murtali f’distanza ta’ erba’ mitt metru, kif allegat fil-programm, ilahhqu l-livelli tal-hoss allegati fl-istess programm. Tant dan mhux minnu illi l-Professur Alec Lapira qghad ferm attent li bl-ebda mod ma jikkometti ruhu li l-livelli msemmija fil-programm kienu fil-fatt jintlahqu mill-murtali f’dawk id-distanzi msemmija u dejjem qal  “….hsejjes ta’ dak il-livell setghu jikkawzaw” il-hsara li beda jindika.

Qatt izda l-Professur Lapira ma qal li dak il-livell ta’ hoss jintlahaq mill-murtali fid-distanza msemmija fil-programm.

L-inqas sens ta’ etika kien jitlob li gideb bhal tas-Sur Catania u kummenti ohrajn fil-konfront ta’ persuni mhux prezenti, kellhom jitwaqqfu mill-prezentatur, aktar u aktar meta wiehed iqis illi dan kien programm li ilu li gie rrekordjat.

Illum forsi wiehed jifhem ahjar ghalfejn is-Sur Fabian Demicoli baqa’ qatt ma rrisponda d-diversi telefonati tas-segretarju ta’ l-Ghaqda meta l-istess segretarju cempel sabiex jikkonferma l-partecipazzjoni ta’ l-Ghaqda Piroteknika Maltija fl-istess programm.

Kif ixxandar il-programm tal-bierah serva biss ta’ attentat biex issir hsara lill-arti Piroteknika Maltija. Ghal darba ohra l-Ghaqda tistieden lil kulhadd biex jiggudika hu x’hini l-verita’.

Dr Michael Falzon LL.D., A.C.I.B., M.P.,
Konsulent Legali
Għaqda Piroteknika Maltija

B’referenza għall-istqarrija maħruġa mill-producers ta’ Xarabank, jibqa’ l-fatt innegabbli illi minkejja li saru diversi attentati mis-segretarju ta’ l-Għaqda Piroteknika Maltija sabiex jikkonferma d-disponibilità ta’ l-Għaqda li tieħu sehem fil-programm ta’ Xarabank, baqgħet qatt ma ngħatat risposta lura lill-istess segretarju ta’ l-Għaqda.

Fil-ġurnata stess tar-recording is-segretarju ta’ l-Għaqda ċempel lill-Where’s Everybody? u staqsa għal Fabian Demicoli.  Dan ġie mgħoti r-risposta li s-Sur Demicoli kien f’laqgħa u kellu jikkuntattja lura lis-Sur Theuma. Dan il-kuntatt baqa’ qatt ma sar.

Ma hix il-policy ta’ l-Għaqda u la tas-segretarju s-Sur Joe Theuma u lanqas tal-Konsulent Legali ta’ l-Għaqda Dr Michael Falzon, li joqgħodu jitkarrbu għal xi spazju fuq il-programm Xarabank.

Huma l-produtturi tal-programm, imtella’ fuq ix-xandir nazzjonali u mħallas mill-flus il-poplu Malti illi għandhom jassiguraw illi il-programmi mtella’ minnhom ikunu bilanċjati u miftuħin għal kulħadd.

Il-fatt, illi minkejja li tħallew diversi risposti għas-Sur Fabian Demicoli sabiex tiġi kkonfermata l-parteċipazzjoni ta’ l-Għaqda Piroteknika Maltija u dan baqa’ ma għamel qatt kuntatt lura, żgur li ma jurix nuqqas min-naħa ta’ l-Għaqda Piroteknika Maltija.

Id-dover ta’ l-Għaqda Piroteknika Maltija hu li tħares l-interessi tal-Pirotekniċi kollha Maltin. Min jaħseb li din se titkarrab għal xi attendenza fuq xi programm televiżiv, hu liema hu, huwa totalment żbaljat.

Il-fatt li xi membru/i ta’ l-Għaqda għandhom id-dettalji ta’ min hu nvolut fil-programm, bl-ebda mod ma jimplika li dawn l-istess membru/i se joqgħodu jitkarrbu lil xi ħadd.

Dawn huma l-fatti u l-Għaqda tqis din il-korrispondenza magħluqa. Kulħadd jiġġudika hu.

Dr Michael Falzon LL.D., A.C.I.B., M.P.,
Konsulent Legali
Għaqda Piroteknika Maltija
 

B’referenza għall-programm Xarabank li se jixxandar illum 6 ta’ Novembru 2009, u li se jitratta s-suġġett tal-festi, l-Għaqda Piroteknika Maltija tixtieq tesprimi s-sorpriża tagħha għall-fatt, illi ħadd mill-uffiċċjali tagħha ma ġie mistieden sabiex jipparteċipa fl-istess programm.

Meta wieħed iqis il-fatt  innegabbli illi f’pajjiżna l-arti Piroteknika hija parti essenzjali u ntegrali mill-festi Maltin, tali aġir minn min itella’ l-programm Xarabank, jagħti lok għal ċertu tħassib.

Sinifikanti l-fatt, illi filwaqt illi fil-bidu kien sar avviċinament minn impjegat tal-Where’s Everybody? u ċioè Fabian Demicoli mas-segretarju ta’ l-istess Għaqda, sabiex l-istess Għaqda Piroteknika Maltija tieħu sehem fil-programm, jidher illi sussegwentement il-produtturi ta’ dan il-programm deherilhom illi kellhom jeskludu lill-Għaqda Piroteknika milli tieħu sehem.

Bħala fatt is-segretarju ta’ l-Għaqda Piroteknika Maltija ċempel aktar minn darba lill-Where’s Everybody? biex jikkonferma d-dispożizzjoni ta’ l-Għaqda Piroteknika biex tieħu sehem f’dan il-programm, saħansitra ċempel ukoll dakinhar stess illi ġie rrekordjat il-programm li se jixxandar illum. L-imsemmi Fabian Demicoli iżda baqa’ qatt ma ċempel lura lis-segretarju ta’ l-Għaqda Piroteknika Maltija.

Aġir bħal dan ma tantx jawgura tajjeb għall-programm miftuħ u bilanċjat kif għandu jkun programm fuq ix-xandir nazzjonali.

L-Għaqda Piroteknika Maltija tittama li ma hemm l-ebda aġenda oħra moħbija wara tali aġir.

Dr Michael Falzon LL.D., A.C.I.B., M.P.,
Konsulent Legali
Għaqda Piroteknika Maltija